24.8.09

Que sòi tornat


Adixatz a tots!
Tostem pas de nau ordinador, malament... mès qu'escrivi totun un messadjòt enta dar navèras, après quauques temps d'abscéncia.

Lavetz, bèth-lèu la rentrada. Que vòi rentrar engüann en Terminau (darrèra classa deu licèu) dab especialitat "sciéncia e vita de la tèrra"; biologia, qué.
En Junh qu'avói passat l'epròba de francés, lavetz los arresultats que son 13/20 a l'escrivut e a l'orau, e encoèra 13 en ua aute matèria qui's nomenta TPE.
Que m'acontenti hèra plan d'aquestas nòtas, qui'm hèn en tot un 13/20 dab coëficient 6, sia autant que la Fisica/Quimia.

Bon, aquestas vacanças, que las èi passadas a casa sobertot. No m'agràdan hèra las vacanças planificadas, deu genre campadge (o "càmping" com at dísen los jànquis) e companhia.
Çò qui a jo m'agrada, qu'ei díse's un matin: "tè, doman que vam aquiu o acerà".
Dongas qu'èi passat quauques dias en Bascoat (Donòstia, Biàrrits...), Medòc e Lanas, mès sobertot en Aragon e Navarra (si no la considéran basca, segur...).
Jo que cèrci lo despaïsament còsta a casa, e aqueths dus país que me'n dèn!
Que sia Sallent de Galhigo/Lanuza (e lo son hestenau!), Chaca, Òsca, Saragòssa o encoèra lo lac de Yesa (la mar deus Pirenèus!), que'm plasó hèra.
Mès lo lòc qui m'agradè mes, que son las Bardenas Reales!
Si no coneixetz, en quauques mots, qu'ei un èrm a las pòrtas deus Pireneus.
Com at podetz véder sus aquestas fòtos, las Bardenas que son un païsadge extraordinari en Euròpa e tabé ua suspresa incredible, tan ei pròixe deus Pirenèus e de las soas sèuvas densas.



Maugrat tot, que plavó aqueth dia. Qu'aimi mes aquerò que lo caumassàs (40 graus a l'ompra e dètz de mes au só!) qui acapoteix.
En tot cap qu'èra plan agradiu, e que'v conselhi plan aquesta destinacion.

Qu'ei tot per oei ;)

Adixatz brabe monde!

3 commentaires:

優次 (Yuji) a dit…

Quina enveja qu'è de vosati europencs, que podetz viatjar tostemps aisidaments sens aver de desplaçar-vos guaire. ;)

Non sabi plan ce qué signifiquen aguestas nòtas pr'amor que non coneishi guaire sus eth sistèma educacionau francés, mès supausi que tot que't va plan! De totas faiçons, sòrt entara rèsta deths examens deth bac!

Florent a dit…

Sabes, jo qu'èi tostem saunejat d'anar en America deth Sud...!
En tot cap, segur que sòi content de víver en Euròpa, mès sobertot ena zòna pirenenca qui ei probablament era mes diversificada. Permor que pòdes passejà'te en nòrd de França, Belgica, País Baix, Alemanha eca... enta jo, no i a pas grand causa de véier, si ès un amator de diversitat de païsadge.

Joan de Peiroton a dit…

Sallent de Gállego, ten, i passèi. Èri au hestiv'òc de Pau enguan.